Klæðskerinn Jóna María Norðdahl hefur sett heimili sitt í Salahverfi í Kópavogi á sölu. Um er að ræða gullfallega 236 fermetra íbúð í tvíbýli en inni í fermetrafjöldanum er auka stúdíóíbúð á neðri hæðinni.
Jóna María rak um árabil klæðskera- og fataverslunina JM Design í Bæjarlind í Kópavogi. Hún skellti í lás í upphafi síðasta árs.
Heimili Jónu er einstaklega hlýlegt og fallegt. Í alrýminu eru hlýir jarðtónar áberandi í bland við falleg, litrík málverk sem fanga augað. Í gegnum allt húsið er fallegur stíll en plöntur skreyta mörg rými heimilisins.
Húsið er hannað af KRark og var byggt árið 2001. Verönd og garður var hannaður af arkitektinum Guðrúnu Norðdahl. Fasteignamat þess er 85.800.000 en ásett verð er 128.800.000 krónur.