Við Vesturbraut í Hafnarfirði er að finna 203 fm einbýlishús sem er á þremur hæðum ásamt kjallara. Húsið var byggt 1915 og hefur verið vel við haldið.
Þegar inn í húsið er komið taka mjúkir litir á móti fólki. Veggir í stofu og eldhúsi eru málaðir í mjúkum sveppatón sem fer vel við rómantísk húsgögn. Í eldhúsinu er hvít innrétting sem passar vel við stílinn á húsinu. Á þessari hæð er líka skemmtileg heimaskrifstofa sem er vel útfærð.
Í borðstofunni eru antík húsgögn sem falla vel inn í umhverfið.
Við hjónaherbergið er einstaklega smekklegt baðherbergi með tveimur vöskum og léttri innréttingu sem er með dökkri steinplötu. Fyrir ofan innréttinguna eru tveir gamaldagsspeglar sem setja svip sinn á herbergið.