Tónlistarkonan Doja Cat hefur sett 340 milljóna glæsivillu sína á sölu. Húsið er í Beverly Hills í Kaliforníu en söngkonan keypti það í febrúar 2021 fyrir 2,2 milljónir bandaríkjadala eða rúmlega 300 milljónir króna. Húsið er innréttað í bóhemstíl, en gluggar sem ná niður í gólf og hráir veggir gefa því einstakan karakter.
Húsið er 223 fermetrar að stærð og á tveimur hæðum. Á neðri hæðinni er að finna glæsilega stofu og einstakt eldhús með hvítum kvartsborðplötum. Úr eldhúsi er gengið inn í borðstofu með einstöku útsýni. Tvö gestaherbergi eru á hæðinni, en frá öðru þeirra er útgengt í bakgarð með glæsilegri sundlaug.
Á efri hæð hússins er glæsilegt hjónaherbergi með flottu fataherbergi og sérsmíðuðum höfðagafli. Einstakt baðherbergi er á hæðinni með sementsbaðkari og óhætt að segja að stemningin minni helst á heilsulind. Frá hjónaherberginu er útgengt á svalir með fallegu útsýni yfir bakgarðinn.