Margir þekktu Sævar Karl Ólason sem best klædda kaupmanninn í bænum eftir að hafa stofnað verslunina Sævar Karl ásamt eiginkonu sinni Erlu Þórarinsdóttur 1974. Verslunina ráku þau fram til ársins 2007 en þá seldu þau fyrirtækið eftir að hafa klætt hina best klæddu íbúa eyjunnar í norðri öll þessi ár. 

Á dögunum opnaði Sævar Karl myndlistarsýninguna Frá degi til dags á Hafnarstræti 16.

„Ég mála abstrakt, fæst við formin í náttúrunni, í þetta skiptið í garðinum mínum. Ég notfæri mér liti, rými og form, sem ég sé þar. Sumarið á Íslandi er einstakt, dagarnir eru langir, náttúran sýnist önnur að morgni en að kvöldi. Ég mála úti þegar sólin skín þá eru litirnir bjartari. Málverk sem tekst vel, er eins og gróðurinn, breytist frá degi til dags,“ segir Sævar Karl. 

Eftir að verslunarrekstrinum lauk fór hann í myndlistarnám. Hann lærði í Myndlistarskólanum í Reykjavík, Listaháskóla Íslands, Kunstakademie BadReichenhall og Kunstakademie Kolbermoor.