Við Lyngholt í Reykjanesbæ er að finna 166 fm íbúð sem búið er að endurnýja mikið. Íbúðin er á efri hæð í húsi sem byggt var 1957.
Mjúkir litir eru í forgrunni í íbúðinni og er íbúðin máluð að miklu leyti í sveppableikum lit sem er hlýlegur. Aðrir veggir eru í hlýjum ljósgráum tónum. Þessi litapalletta fer vel við hvítar innréttingar og falleg húsgögn en einnig við parketið á gólfunum.
Þykkir listar eru meðfram loftinu og líka meðfram gólfinu. Í kringum gluggana eru gluggakarmar sem búið er að lakka.
Stofan er einnig nýtt sem borðstofa og er rýmið opið inn á ganginn sem er vel nýttur sem heimaskrifstofa.
Í eldhúsinu eru marmaraborðplötur sem taka innréttinguna upp á næsta stig. Í eldhúsinu er að finna hinn klassíska íslenska borðkrók sem hefur að geyma E60-stólinn frá Sólóhúsgögnum en hann var hannaður 1960. Bekkur úr sömu línu er upp við vegginn en þessi húsgögn eru ennþá í framleiðslu og njóta mikilla vinsælda.