Nú getur þú orðið nágranni Karls III. Bretakonungs því glæsileg villa með útsýni yfir Windsor-kastala er komin á sölu fyrir 30 milljónir punda, eða rúmlega 4,8 milljarða króna. 

Villan hefur unnið fjölda verðlauna fyrir einstakan arkitektúr sinn, en hún stendur á glæsilegri 40 hektara lóð og býður upp á mikinn lúxus. Þar má meðal annars finna tíu baðherbergi, níu svefnherbergi, tvö eldhús, heimabíó, saunu og leikherbergi.

Þyrlupallur og reiðhöll

Á lóðinni er allt til alls, en þar má finna tólf metra innisundlaug, heitan pott, tennisvöll, heimarækt og þyrlupall ásamt átta bíla bílskúr, reiðhöll og tíu hesthúsum. 

Það er ekkert því til fyrirstöðu að nýr eigandi haldi glæsilegar veislur í villunni, og bjóði jafnvel nýja nágranna sínum yfir í gott teiti við sundlaugina enda leynist stórkostlegur vínkjallari í húsinu sem rúmar yfir þúsund flöskur.