Uppáhaldsstaður Auðar Ýrar Elísabetardóttur á fallegu heimili hennar Hlíðunum í Reykjavík er baðkarið en Auður setti þau skilyrði þegar hún og eiginmaður hennar Marínó Sigurðsson voru í fasteignaleit var að það væri baðkar í henni. Íbúðina keyptu þau haustið 2020 í miðjum heimsfaraldri, sem var eftir á að hyggja ekki mjög sniðugt að sögn Auðar því hún er húðflúrari og var tekjulaus í þrjá mánuði vegna lokana.
Auður flúrar á Íslenzku húðflúrstofunni og myndskreytir barnabækur til hliðar. Eiginmaður hennar er húsgagnasmiður og vinnur hjá Minjavernd. Saman eiga þau tvö börn, tíu ára dóttur og fjögurra ára son.
Íbúðin er undir súð og ákaflega hlýleg og falleg en á þessum tveimur árum hafa hjónin gert hana að sinni. „Hún var frekar illa farin eftir að hafa verið í útleigu, og bauð uppá möguleikann að auka verðmætið mjög mikið með smá snýtingu. Staðsetningin heillaði okkur líka. Það er einhvern veginn allt sem við þurfum í svo mikilli nálægð. Stutt í vinnuna og margir fjölskyldumeðlimir og vinir í göngufjarlægð,“ segir Auður.
Mánuðinn sem þau fengu íbúðina afhenta mátti Auður ekki vinna vegna faraldursins og gat því verið í fullri vinnu í framkvæmdum. „Það þurfti svosem ekki að gera mikið en við pússuðum og olíubárum gólfið, tókum niður tvo veggi og settum upp einn til að bæta við auka herbergi fyrir unglinginn. Svo fengum við gefins gult klósett sem við settum upp,“ segir Auður.
Auður segir þau hafa gert sitt besta til að halda í upprunalegt útlit íbúðarinnar, en byggingarár hússins er 1955. Létu þau sérsmíða gerefti á nýja herbergið svo það myndi passa við restina af íbúðinni. Einnig fundu þau notaða hurð á netinu sem var sambærileg í útliti og hinar hurðarnar.
Auður leggur mikið upp úr því að andrúmsloftið á heimilinu sé hlýlegt og notalegt. „Þetta á að vera griðastaðurinn okkar sem knúsar mann þegar maður kemur heim,“ segir Auður.
„Ég er voða mikill safnari, svo það hefur sett minn svip á íbúðina. Bækur, plöntur, steinar og hlutir með sögu kalla mikið á mig. Ég reyni að kaupa sem minnst af nýju, og einhvern vegin hafa hlutir ratað til mín óvænt og oft alveg frítt svo þetta hipsumhaps af hlutum gerðu íbúðina aðallega að minni,“ segir Auður.
Hennar uppáhaldsstaður á heimilinu er ofan í baðkarinu, sem er extra djúpt. „Það gerir mig mjög hamingjusama. Eina skilyrðið sem ég setti þegar við vorum að leita okkur að íbúð var að það væri baðkar,“ segir Auður.
Húsgögn úr tekki hafa verið vinsæl undanfarin ár, líkt og á tímabili á síðustu öld. Á heimili Auðar og Marínós er að finna nokkur tekkhúsgögn, hansahillurnar fallegu og svo skrifborð. Skrifborðið er uppáhaldshúsgagn Auðar.
„Það var lokaverkefni mannsins míns í húsgagnasmíði. Það er gullfallegt og var gert með fullkomnum skúffum fyrir teiknidótið mitt,“ segir Auður.
Hansahillurnar koma úr ýmsum áttum en að mestu frá afa Marínós með smá viðbótum frá ömmu og afa Auðar og svo einhverju sem þau fundu á Facebook.
Íbúðin er litrík og falleg, en Auður valdi flesta litina handahófskennt. „vo sagði maðurinn minn nei við sumu svo ég aðlagaði þá liti. Mesti brandarinn var að ég valdi kokteilsósubleikan á vegginn sem mér var neitað um svo ég skipti yfir í hamborgarasósu,“ segir Auður og passar liturinn svona ljómandi fallega.
Framkvæmdum er ekki lokið hjá þeim, en þau eru nú að safna sér fyrir nýrri borðplötu í eldhúsinu og hyggjast samhliða því ætla að stækka eldhúsinnréttinguna út undir gluggann. Svo vilja þau einnig setja gólflista.