Smáragata er eftirsótt enda í hjarta miðborgar Reykjavíkur án þess að það sé búið að opna bar í næstu íbúð eða fólk sé að vakna á nóttunni við glamrið í hjólum á ferðatöskum. Við Smáragötu 11 er að finna vandað og huggulegt einbýli sem byggt var 1937. Húsið er 282 fm að stærð og á þremur hæðum.
Húsið hefur breyst töluvert frá því það var byggt. Þess má geta að í eldhúsinu er nýleg innrétting sem teiknuð var af Yrki arkitektum og sérsmíðuð inn í húsið. Arkitektastofan hannaði líka skápa í forstofu og í borðstofu og setur hönnunin svip sinn á heimilið. Eins og sjá má á myndunum var þess gætt að hönnun á skápum og innréttingum passaði við byggingarstíl hússins. Örsmáu mósaíkflísarnar í eldhúsinu eru til dæmis gott dæmi um það.
Heimilið er búið eigulegum húsgögnum eftir þekkta hönnuði. Í stofunni eru til dæmis sófar Eriks Jörgensens og glerborð úr Casa sem var arfavinsælt í kringum 1986 og lifir hönnunin ennþá fantagóðu lífi.
Sófarnir fara vel við Barcelona-stólinn og listaverk eftir þekkta íslenska listamenn eins og Tryggva Ólafsson.