Tímaritið Wallpaper, sem er leiðandi á sviði tísku og hönnunar, tók saman lista yfir glæsilegustu hönnunarverslanir heims. Þar kemur fram að ný verslun 66°Norður á Regent Street í Lundúnum sé ein af þeim glæsilegustu. Á listanum eru verslanir heimsfrægra tískumerkja á borð við Dolce & Gabbana, Prada, Bottega Veneta og Fendi svo einhverjar séu nefndar.
Í umfjöllun Wallpaper segir að sérlega vel hafi tekist til við hönnun nýrrar verslunar íslenska fatamerkisins á Regent Street. Arkitektinn, Gonzalez Haase, sem búsettur er í Berlín, hannaði verslunina en þar er að finna mörg heillandi smáatriði eins og teppaklædda veggi og gólf sem eiga að minna á Rauðhóla. Þar er líka að finna veggi sem eru klæddir eins og jarðvegur og þar eru líka skúlptúrar sem minna á bergkviku og ljósakerfi sem líkir eftir mistruðum, hvítum himni.
Wallpaper hefur eftir Helga Rúnari Óskarssyni, forstjóra 66°Norður, að merkið hafi verið stofnað árið 1926 til að klæða íslenska sjómenn og vernda þá fyrir náttúruöflunum við vinnu sína á hafinu á norðurheimsskautsslóðum.
„Síðan þá höfum við framleitt gæðafatnað sem stenst allar kröfur til að lifa og njóta í námunda við náttúruöflin. Besta leiðin til að kynna merkið og segja frá sjálfbærnisögu þess er að sýna gæðin og endinguna í vörunum á áhrifaríkan hátt í verslunum okkar,“ segir Helgi Rúnar í samtali við Wallpaper.