Notalegt og sjarmerandi í Garðabænum

Við Holtsveg í Urriðaholtinu er að finna sjarmerandi 111 fm íbúð sem er staðsett á annarri hæð í fjölbýlishúsi sem byggt var árið 2017. Íbúðin er fallega innréttuð, en það voru innanhússhönnuðirnir Berglind Berndsen og Helga Sigurbjarnadóttir sem hönnuðu allar innréttingar. 

Íbúðin státar af þremur svefnherbergjum og einu baðherbergi, en í alrýminu eru eldhús, borðstofa og stofa samliggjandi. Í eldhúsi má sjá stílhreina dökka innréttingu með eyju sem tónar vel við fallegt borðstofuborð og svart bast-ljós í borðstofunni. 

Glæsilegir húsmunir eru í hverju horni, en þar má nefna guðdómlegan grænan sófa úr velvet-efni sem prýðir stofuna ásamt hinum stílhreina Little Big-stól frá Norr11. Falleg listaverk og speglar á veggjunum setja svo punktinn yfir i-ið. 

Af fasteignavef mbl.is: Holtsvegur 12