Falleg lýsing getur gert gæfumuninn, og þá sérstaklega núna í janúarbyrjun þegar skammdegið rænir okkur mest allri birtu. Ljós geta þó gert margt annað en að lýsa upp heimilið, en í dag er úrvalið af fallegum hönnunarljósum mikið og óhætt að segja að þau geti sannarlega sett punktinn yfir i-ið í hvaða rými sem er.
Smartland tók saman nokkur sérlega falleg hönnunarljós sem gleðja augað og hleypa þar að auki birtu inn í líf okkar þegar við þurfum mest á því að halda.
Astep Model 2065
Stílhreint ljós úr smiðju Gino Sarfatti, en hann er þekktur fyrir að gera tilraunir með mismunandi form og efnisval. Ljósið var upprunalega hannað árið 1950 fyrir ítalskt lýsingarfyrirtæki í eigu Sarfatti, en rétt fyrir aldamót kom barnabarn hans því aftur á markaðinn í samvinnu við Flos.
Eiffel veggljós
Ljósið var hannað af Krøyer Sætter Lassen fyrir Frama árið 2019 með einfaldleika að leiðarljósi. Þrátt fyrir einfaldleikann býr ljósið yfir einstökum sjarma og tekur sig glæsilega út.
Drop Chandelier Bulp
Hönnuðir þessa fallega ljóss sóttu innblástur í danskan módernisma frá fimmta áratugnum. Armar ljóssins eru hreyfanlegir og því er hægt að útgæra það á marga skemmtilega vegu, en falleg og hlý birta er af ljósinu sem setur sterkan svip á rýmið.
Formakami ljósin
Falleg handgerð ljós úr pappír sem hafa slegið rækilega í gegn, en skemmtileg form ljósanna gefa þeim mikinn sjarma. Það var Jaime Hayon sem hannaði ljósin fyrir, en hann sótti innblástur í hefðbundna asíska lampa.
Flowerpot VP3 borðlampi
Klassísk hönnun frá árinu 1969, en þessi glaðlegi og skemmtilegi lampi var hannaður af Verner Panton. Lampinn varð fljótlega mikið hönnunartákn og prýðir mörg falleg heimili á Íslandi.
Volumen loftljós
Þetta grófa og flotta „industrial“ loftljós er frá House Doctor, en það er óhætt að segja að ljósið hitti beint í mark hjá hönnunarunnendum sem kunna að meta grófa og hráa húsmuni.
Buster borðlampi
Fallegur borðlampi frá Watt&veke úr basti. Það er einstaklega falleg birta sem kemur af lampanum sem býr til afar notalega stemningu.
Composition ljós
Afar sjarmerandi veggljós sem hannað af hönnuðinum Theodóru Alfreðsdóttur. Ljósið er úr stein og málm, en Theodóra er þekkt fyrir sterka formnotkun í hönnun sinni. Sannkallað listaverk á vegginn!
Pappaljós
Danska hönnunarmerkið Hay hefur slegið í gegn á heimsvísu, enda með skemmtilegt úrval af húsmunum með skandinavísku yfirbragði. Pappaskermurinn veitir hlýja og milda birtu, en þar að auki er ljósið stílhreint og klassískt.
Clam borðlampinn
Borðlampi frá 101 Copenhagen. Tveir skermar umlykja peruna og skapa fallega lýsingu sem er mitt á milli óbeinnar og beinnar lýsingar, en lampinn er skemmtilegur í laginu og hefur mikinn karakter.
w171 Alma
Fallegt hönnunarljós úr smiðju Tham & Videgård þar sem mjúkar andstæður milli ljóss og skugga koma fram.
T-Lamp
Fallegur lampi sem hannaður var af Regular Company fyrir Frama árið 2017. Þó lampinn sé stílhreinn og einfaldur hefur hann stórkostlegt yfirbragð, en hægt er að halla skerminum og stjórna þannig hvert ljósinu er varpað.
Cestita lampi
Guðdómlegur lampi sem hannaður var af Miguel Milá árið 1962. Lampinn kemur í tveimur stærðum, en formbeygð kirsuberjagrindin og opal-litaða glerið tóna sérlega vel saman og fegrar hvert heimili.