Við Kjóahraun í Hafnarfirði er að finna 182 fm einbýli á tveimur hæðum. Húsið var byggt árið 1999, en á undanförnum árum hefur eignin fengið þó nokkra yfirhalningu að innan og óhætt að segja að útkoman sé afar glæsileg.
Á neðri hæðinni er rúmgóð og björt stofa þar sem einfaldleikinn er í forgrunni og því fá fallegir húsmunir algjörlega að njóta sín. Frá stofunni er útgengt á 97 fm timburverönd með heitum og köldum potti og fallegri útilýsingu.
Á sömu hæð má finna samliggjandi eldhús og borðstofu með stórum gluggum sem hleypa mikilli birtu inn í rýmið. Eldhúsið er skemmtilega upp sett með snyrtilegri hvítri innréttingu. Í borðstofunni má svo sjá píanó og fallegan bekk sem setja sannarlega punktinn yfir i-ið.
Fjögur svefnherbergi eru á efri hæð hússins auk baðherbergis með „walk in“ sturtu og innbyggðum blöndunartækjum. Svarbrún innrétting með ljósum akrílstein og tveimur vöskum prýðir baðherbergið, en stílhrein svört blöndunartæki setja glæsibrag á rýmið.