Við Ásakór í Kópavogi er að finna afar huggulega 157 fm íbúð á þriðju hæð í steinsteyptu fjölbýlishúsi sem byggt var árið 2007. Hlýir og mjúkir tónar eru einkennandi í íbúðinni þar sem fallegir húsmunir eru í hverju horni.
Í alrými eru eldhús, stofa og borðstofa samliggjandi. Stórir gluggar hleypa mikilli birtu inn í rýmið sem er málað í mjúkum brúnum tón. Grænar plöntur og þurrkuð strá eru víðsvegar í rýminu og búa til notalega stemningu.
Náttúruleg efni eru áberandi í húsmununum, þá sérstaklega viður, bast og leir. Fallegar mynstraðar mottur grípa án efa augað, en þær eru víðsvegar um íbúðina og setja sjarmerandi svip á eignina.
Frá stofu og borðstofu er útgengt á tvennar svalir, annars vegar 10 fm suðursvalir og hins vegar 10 fm vestursvalir með góðu skjóli. Þá nýtur íbúðin sólar frá sólarupprás til sólseturs.