Við Barðastaði í Reykjavík er að finna afar smekklega 109 fm íbúð á fyrstu hæð í fjölbýlishúsi sem byggt var árið 2000. Íbúðin er í senn stílhrein, björt og vel skipulögð.
Eldhús, stofa og borðstofa eru samliggjandi í björtu alrými. Stílhrein hvít innrétting og stór eyja prýða eldhúsið, en falleg borðplata rammar eyjuna inn á skemmtilegan máta. Þá má sjá hinar klassísku og tímalausu „subway“ flísar í eldhúsi sem gefa rýminu mikinn sjarma.
Notalegur borðkrókur er inn af eldhúsi. Þar má sjá svart Flowerpot-loftljós með mattri áferð eftir danska arkitektinn Verner Panton. Ljósið hannaði hann árið 1968, en í stofunni má einnig sjá Flowerpot-lampa í hlýlegum lit.
Út stofu er útgengt á rúmgóðan pall með heitum potti. Umhverfis pallinn hefur skjólvegg verið komið fyrir með fallegri lýsingu og því vel hægt að njóta sín í pottinum hvernig sem viðrar.