Arkitektinn og listakonan, Steinunn Eik Egilsdóttir, hefur sett íbúð sína við Fellsmúla í Reykjavík á sölu. Eignin, sem er 93 fm að stærð, er staðsett á þriðju hæð í fjölbýlishúsi sem reist var árið 1963.
Steinunn Eik hefur innréttað íbúðina á sjarmerandi máta þar sem hlýleg litapalletta og fallegir húsmunir eru í lykilhlutverki.
Stofa og borðstofa eru samliggjandi í björtu rými með stórum glugga, en þar má sjá fallega list og hönnun í hverju horni. Yfir borðstofuborði hangir stílhreint hönnunarljós frá Flos sem setur skemmtilegan svip á rýmið. Frá stofunni er útgengt á sólríkar svalir til suðurs.
Í eldhúsi má sjá rauðbrúna innréttingu í stíl við upphengda veggskápa í stofunni, en liturinn skapar mikla hlýju og tónar vel við stórt listaverk í rýminu. Í borðkróki er afar notaleg aðstaða með fallegri lýsingu.