Við Njálsgötu í Reykjavík er að finna sjarmerandi 82 fm íbúð á annarri hæð í fjölbýlishúsi sem reist var árið 1932. Upprunalegir listar og rósettur búa til skemmtilega stemningu í íbúðinni sem hefur verið fallega innréttuð. 

Fallegar ljósbláar rennihurðar aðskilja stofu og eldhús, en rýmin eru bæði björt með góðum gluggum. Í eldhúsi er snyrtileg hvít innrétting, en ljósbláar flísar milli neðri og efri skápa gefa rýminu karakter og tóna vel við rennihurðarnar. 

Þá má sjá klassíska og tímalausa borðstofustóla, Sjöuna frá Fritz Hansen, og falleg hönnunarljós úr smiðju Verner Panton í eldhúsi. 

Ljósir tónar og skrautlegar flísar

Tvö svefnherbergi eru í eigninni, annars vegar rúmgott og bjart hjónaherbergi með speglaskápum sem setja skemmtilegan svip á rýmið. Hins vegar minna svefnherbergi sem núverandi eigendur hafa gert að afar snotru barnaherbergi, en þar má sjá ljósbleikan viðarpanel að hluta á veggjum.

Í forstofu og á baðherbergi hefur skemmtilegum mynstruðum flísum verið komið fyrir á gólfi sem gefa eigninni mikinn karakter. Á baðherberginu fær ljósblái liturinn aftur að njóta sín í flottum flísum á baðkari og að hluta á veggjum. 

Af fasteignavef mbl.is: Njálsgata 72