Við Kvíslartungu í Mosfellsbæ er að finna 240 fm endaraðhús á tveimur hæðum sem reist var árið 2008. Mikil lofthæð og stórir gluggar gefa eigninni mikinn glæsibrag.
Á fyrstu hæð er að finna sannkallað draumaeldhús með trylltu útsýni. Eldhúsið er einkar rúmgott með góðu vinnu- og skápaplássi. Fallegar grátóna flísar gefa rýminu mikinn glæsibrag og tóna fallega við græna veggina og ljósa innréttinguna.
Í eldhúsinu eru gluggar á þrjá vegu sem veita stórkostlegt útsýni yfir náttúruna í kring og setja án efa puntkinn yfir i-ið.
Borðstofan er björt og rúmgóð með stórum gólfsíðum gluggum. Græni liturinn á veggjunum býr til hlýlega stemningu í rýminu þar sem fallegir húsmunir sjást í hverju horni.
Frá borðstofunni er útgengt í flottan bakgarð til suðurs með fallegu útsýni. Þar er að finna bæði heitan og kaldan pott ásamt 9 fm garðhúsi með saunu og sturtu.