Smartland Mörtu Maríu | Heimili og hönnun | mbl | 28.5.2023 | 13:00

Óvenjuleg eldhúsinnrétting í glæsilegri stúdíóíbúð

Í stúdíóíbúð í Edinborg má sjá skemmtilega lausn á eldhúsaðstöðu. Ljósmynd/Airbnb.com

Í Edinborg í Skotlandi er að finna afar sjarmerandi stúdíóíbúð með glæsilegu útsýni yfir borgina. Íbúðin hefur verið vandlega innréttuð á fágaðan máta og óhætt að segja að klassísk hönnun ráði þar ríkjum.

Þótt íbúðin sé ekki stór nýtist rýmið sérlega vel, en þar er fagurfræðin í fullkominni sátt við notagildi. Í björtu alrými með góðri lofthæð er stofa, borðstofa, sérsmíðuð eldhúsinnrétting og hjónarúm. Gólfsíðir franskir gluggar setja svo punktinn yfir i-ið.

Eldhúsið hefur vakið sérstaka athygli, en það hefur verið falið inni í sérsmíðuðum skáp sem stendur í miðri íbúðinni og aðskilur stofu og svefnaðstöðu. Þegar innréttingin er lokuð virðist hún ekki vera neitt annað en fagurblár skápur.

Ljósmynd/Airbnb.com

„Leynieldhús“ sem slær í gegn

Þegar skápurinn er hins vegar opnaður leynist þar fullbúið eldhús með vaski, uppþvottavél, helluborði, örbylgjuofni, ísskáp með frysti, katli, brauðrist og franskri pressu. Þar að auki eru öll nauðsynleg eldhúsáhöld til staðar, en innréttingin er frábær lausn fyrir smærri rými.

Ljósmynd/Airbnb.com

Íbúðin er til útleigu á bókunarvef Airbnb, en hún þykir vera í fullkominni stærð fyrir pör sem dreymir um að upplifa lúxus í Edinborg. Nóttin yfir sumartímann kostar 347 bandaríkjadali, eða sem nemur rúmlega 48 þúsund krónur á gengi dagsins í dag.