Listamaðurinn, rithöfundurinn og aktívisistinn, Birna Þórðardóttir, hefur sett 153 fm parhús sitt í miðbæ Reykjavíkur á sölu. Um er að ræða hús með 8 herbergjum og þremur baðherbergjum sem byggt var 1918. Birna festi kaup á húsinu fyrir um tveimur áratugum. 

Húsið er rauðmálað að utan og steinsteypt. Þegar inn er komið tekur litríkur heimur Birnu Þórðardóttur við. Þar er að finna sægræna stofu sem hittir appelsínugulan vegg sem gengur inn í eldhúsið en þar tekur blái liturinn völdin. Þessi glaðalitapalletta lífgar upp á allt og gleður augað. 

Herbergi hússins eru máluð í ýmsum litum sem skapar skemmtilega heild. Vinnuherbergið er kóralbleikt á meðan eitt af þremur baðherbergjum er málað í ljósbláum lit. Risið er fjólublátt með hvítum loftum og furuklæddum veggjum sem ná um 90 sm frá gólfi. 

Það er óhætt að segja að litaval heimilisins sé í stíl við klæðaburð Birnu Þórðardóttir sem hefur vakið athygli í gegnum tíðina eins og sést glögglega þegar myndasafn mbl.is er skoðað. 

Af fasteignavef mbl.is: Óðinsgata 11