Embættisbústaður biskups Íslands við Bergstaðastræti hefur verið auglýstur til sölu. Um er að ræða 487 fm einbýli sem reist var 1928 og stendur á fallegum stað í sunnanverðum Þingholtum í 101 Reykjavík.

Húsið stendur á 912 fm lóð sem er vel ræktuð. Fasteignamat hússins er 292.050.000 kr. Óskað er eftir tilboði í eignina.

Ráðuneytið keypti húsið 1968

Paul Smith reisti húsið en hann var verkfræðingur sem vegnaði vel í viðskiptum. Árið 1920 stofnaði hann innflutnings- og heildsölufyrirtæki í Reykjavík sem var kennt við hann. Fyrirtækið seldi rafvörur og varð að versluninni Smith og Norland 1956. Guðmund­ur Vil­hjálms­son­, for­stjóri Eim­skipa­fé­lags Íslands, bjó í húsinu um tíma ásamt fjölskyldu sinni. 

Dóms- og kirkjumálaráðuneytið keypti húsið árið 1968 og 1994 eignaðist Kirkjumálasjóður húsið. Frá 2021 hefur það verið í eigu Þjóðkirkjunnar. 

Sr. Agnes Sigurðardóttir, fyrrverandi biskup Íslands, flutti inn í húsið við Bergstaðastræti þegar hún tók við embætti. Hún bjó sjálf á efri hæðinni en neðri hæðin var notuð fyrir samkomur og veisluhöld. Árið 2020 var hún gestur í Heimilislífi á Smartlandi og fór yfir sögu hússins og lífshlaup sitt. 

Nýr biskup flytur ekki í húsið

Sr. Guðrún Karls Helgudóttir, nýkjörinn biskup Íslands, sagði frá því á dögunum að hún myndi ekki flytja inn í húsið og það yrði auglýst til sölu. 

„Ég mun búa áfram í Grafar­vogi í mínu eig­in húsi,“ sagði Guðrún í viðtali við mbl.is. Þar kom fram að í framtíðinni yrðu leigðir salir eða annars konar húsnæði þegar biskup héldi boð og móttökur.

Sjá nánar á fasteignavef mbl.is: Bergstaðastræti 75