Smartland Mörtu Maríu | Heimili og hönnun | mbl | 8.9.2024 | 18:00 | Uppfært 9.9.2024 11:32

Er þetta minnsta einbýlishús landsins?

Húsið telur aðeins 28 fm og er elsta húsið á Ólafsfirði. Ljósmynd/Af fasteignavef mbl.is

Marga dreymir um að eignast einbýlishús og öðlast í leiðinni frelsi og frið frá háværum nágrönnum sem fara alltof seint að sofa. Það er algengt að einbýlishús séu frekar í stærri kantinum og þar af leiðandi með hærri verðmiða, en það virðist þó ekki vera algilt.

Við Kirkjuveg á Ólafsfirði er til sölu 28 fm krútthús sem stendur á 350 fm lóð nálægt hafnarsvæðinu. Húsið kallast Sæbali og er elsta húsið á Ólafsfirði, en það var reist árið 1895.

Fram kemur í fasteignaauglýsingunni að búið sé að gera húsið upp bæði að innan og utan í samvinnu við Húsfriðunarnefnd ríkisins, en að utan er húsið klætt með sérsmíðuðum panel eftir gömlu klæðningaborði sem fannst við framkvæmdir á húsinu. Þá eru gluggarnir og útidyrahurðin einnig sérsmíði eftir teikningum frá arkitektinum Magnúsi Skúlasyni.

Héldu í sögulegan sjarma hússins

Haldið var í sjarma hússins þegar það var gert upp að innan um leið og rýmið var opnað og hiti settur í gólfin. Á gólfum hússins má sjá jarðleirsflísar frá englandi, vínilparket og furuborð sem setja án efa svið svip sinn á rýmin.

Í eldhúsinu má sjá hvíta innréttingu ásamt innbygðum ísskápi og gamalli Rafha eldavél í anda gamla tímans, en panill á veggjum hefur verið málaður í ljúfum bláum tón sem skapar notalegt andrúmsloft.

Í húsinu er eitt svefnherbergi og eitt baðherbergi. Helena Hansdóttir Aspelund er eigandi hússins en Smartland greindi frá því í fyrra þegar hún byrjaði með Gunnari Lárusi Hjálmarssyni tónlistarmanni eða Dr. Gunna eins og hann er kallaður.