Embætt­is­bú­staður bisk­ups Íslands við Bergstaðastræti hefur verið seldur. Hann var auglýstur til sölu á dögunum en um er að ræða 487 fm ein­býli sem reist var 1928. Húsið stendur á fallegum stað í sunn­an­verðum Þing­holt­um í 101 Reykja­vík. Húsið stend­ur á 912 fm lóð sem er vel ræktuð. Fast­eigna­mat húss­ins er 292.050.000 kr. 

Félag Birnu Jennu Jónsdóttur, EVB ehf. er kaupandi hússins. Birna Jenna er sjálfstæður fjárfestir sem starfaði áður í íslenska bankakerfinu. 

Ráðuneytið keypti húsið 1968

Paul Smith reisti húsið en hann var verk­fræðing­ur sem vegnaði vel í viðskipt­um. Árið 1920 stofnaði hann inn­flutn­ings- og heild­sölu­fyr­ir­tæki í Reykja­vík sem var kennt við hann. Fyr­ir­tækið seldi raf­vör­ur og varð að versl­un­inni Smith og Nor­land 1956. Guðmund­ur Vil­hjálms­son­, for­stjóri Eim­skipa­fé­lags Íslands, bjó í hús­inu um tíma ásamt fjöl­skyldu sinni. 

Dóms- og kirkju­málaráðuneytið keypti húsið árið 1968 og 1994 eignaðist Kirkju­mála­sjóður húsið. Frá 2021 hef­ur það verið í eigu Þjóðkirkj­unn­ar. 

Sr. Agnes Sig­urðardótt­ir, fyrr­ver­andi bisk­up Íslands, flutti inn í húsið við Bergstaðastræti þegar hún tók við embætti. Hún bjó sjálf á efri hæðinni en neðri hæðin var notuð fyr­ir sam­kom­ur og veislu­höld. 

Nýr bisk­up flyt­ur ekki í húsið

Sr. Guðrún Karls Helgu­dótt­ir, ný­kjör­inn bisk­up Íslands, sagði frá því á dög­un­um að hún myndi ekki flytja inn í húsið og það yrði aug­lýst til sölu. 

„Ég mun búa áfram í Graf­ar­vogi í mínu eig­in húsi,“ sagði Guðrún í viðtali við mbl.is. Þar kom fram að í framtíðinni yrðu leigðir sal­ir eða ann­ars kon­ar hús­næði þegar bisk­up héldi boð og mót­tök­ur.