Hjónin Álfrún Pálsdóttir og Viktor Bjarki Arnarsson hafa sett glæsiíbúð sína við Meistaravelli í Reykjavík á sölu. Álfrún er viðskiptafræðingur og hefur komið víða við í fjölmiðlum en hún var um tíma ritstjóri glanstímaritsins Glamour. Nú síðast starfaði hún hjá Hönnunarmiðstöð sem kynningarstjóri en hefur sagt starfi sínu lausu og mun hefja störf hjá Íslandsstofu í nóvember. Viktor er líka viðskiptafræðingur, fótboltamaður og þjálfari en hjónin bjuggu úti í heimi um tíma þar sem hann var atvinnumaður í fótbolta. 

Álfrún og Viktor festu kaup á íbúðinni árið 2016 og hafa búið þar síðan. Íbúðin er staðsett í blokk sem reist var 1965 og er 102fm að stærð. Íbúðin er fjögurra herbergja og er á annarri hæð. 

Opið eldhús inn í stofu

Eldhúsið er opið inn í stofuna og er dökkbrún innrétting í eldhúsinu með granítborðplötum. Veggirnir í eldhúsinu eru með kalkáferð sem gefur hlýju og svip. Stofan hefur að geyma hlýleg húsgögn, ljósan sófa, String-hillur, viðarborð, svan og PH-ljós. 

Fallegur heildarsvipur er á íbúðinni og hver hlutur á sinn stað. 

Af fasteignavef mbl.is: Meistaravellir 13