Fjölmiðlakonan Linda Blöndal hefur sett íbúðina við Sæbólsbraut á sölu. Linda, sem hefur starfað sem fréttakona á RÚV síðustu ár, er að flytja austur á Selfoss. Hún segir það hugrakka ákvörðun að fara frá höfuðborgarsvæðinu sem er henni kært.

Linda ætlar að segja skilið við fréttamennskuna og einbeita sér að gróðurrækt en öll hennar nánasta fjölskylda er búsett á svæðinu. 

„Ég er orðin sérstakur áhugamaður um furutré. Ég útiloka þó ekki neitt í framtíðinni enda er blaðamennska „vírus“ sem ekkert læknar nema hvíld og það er ég að gera,“ segir Linda. 

Íbúðin er 70 fm og staðsett á vinsælum stað í fjölbýlishúsi á Kársnesinu í Kópavogi. Íbúðin er smekklega innréttuð á stílhreinan og persónulegan hátt. 

Eitt svefnherbergi og eitt baðherbergi er í íbúðinni. Eldhúsið er opið að hluta til inn í stofu sem skapar skemmtilegt rými. Rúmgóðar suðursvalir með miklum gróðri gera mikið fyrir íbúðina.

Sjá á fasteignavef mbl.is: Sæbólsbraut 28