Tónlistin er aldrei langt undan hjá Haraldi Frey Gíslasyni en hún leikur til að mynda stórt hlutverk í nýrri barnabók hans, Bieber og Botnrassa. Gamli rokkarinn er aðeins byrjaður að mýkjast og segir að þol sitt fyrir óþolandi jólögum hafi aukist með árunum.
Gleðin og friðurinn kemur Haraldi í jólaskap. „Þegar allt dettur í dúnalogn eftir að hvirfilbylur jólabrjálæðisins hefur feykt öllum um koll, lognið á eftir storminum,“ segir Haraldur. Hann vill þó ekki viðurkenna að hann byrji sjálfviljugur að hlusta á jólalög fyrir jólin heldur skelli þau á hvort sem honum líkar betur eða verr.
„Eins sjálflægt og það hljómar þá á Ave María í flutningi Botnleðju sérstakan stað í mínu hjarta. Það er svo brothætt að maður bíður alltaf eftir því að það brotni í þúsund mola og brotin kastist í allar áttir,“ segir Haraldur um uppáhaldsjólalagið sitt en fleiri rokkhljómsveitir eiga lög á jólalagalista Haraldar.
Silent night - Sufjan Stevens
„Ef jólin væru rödd þá væru þau röddin hans Sufjan Stevens. Ofurfagurt.“
Það eru ekki alltaf jólin - Þröstur upp á Heiðar
„Sársaukinn og depurðin er áþreifanleg. Það eru nefnilega ekki alltaf jólin.“
A night in Christmastown - Lada sport
„Einfaldlega drulluflott lag. 2:24 af jólum. Jólin þurfa ekki alltaf að vera löng.“
Landslide - Smashing pumkins
„Held að þetta sé ekki jólalag. Þegar ég fór að leita að jólalögum til að fylla þennan lista fann ég þetta lag á jólaplötu í flutningi Fleedwood Mac sem er upprunalegur flytjandi lagsins. Fallegt lag.“
Happy Xmas (War Is Over) - John Lennon
„Stríðið er búið ef þú vilt það. Það þarf ekki að segja meir.“
For - C Duncan
„Þetta er ekki jólalag en það voru jól þegar ég hlustaði fyrst á plötu C Duncan, Architect, og alltaf þegar ég hlusta á hana minnir hún mig á jólin.“
Christmastime - The smashing pumkins
„Jólabjöllur, fiðlur og og skemmtilega pirrandi rödd Billy Corgan gerir galdurinn.“
Christmas in Hollis - Run-DMC
„Rapp af gamla skólanum um jól í Queens í New york. Saxófónn og plöturispun er klikkað kombó.“
Fleet foxes - White winter hymnal
„Ekki heldur jólalag í bókstaflegum skilningi en þetta eru jólin fyrir mér.“
Ave María - Botnleðja
„Mjög svo sjálflægt val. Fór frá því að þola ekki þennan flutning í að elska hann. Það er breið spönn.“