Karl Steingrímsson, oft kenndur við Pelsinn, sló upp veislu í Austurstræti 16 til að kveðja húsnæðið sem hefur verið í hans eigu um nokkurra ára skeið. Húsið hýsti nú síðast skemmtistaðinn Esju en áður var veitingastaðurinn Apótekið í húsinu. Austurstræti 16 á sér langa sögu en það var byggt á árunum 1916-1918 eftir að húsið sem áður stóð á lóðinni brann. 

Húsið var hannað af Guðjóni Samúelssyni og voru áhrifin í byggingarstílnum norræn og þjóðlega með júgendáhrifum.

Húsið var byggt af fyrirtækinu Nathan og Olsen og var húsið frumraun Guðjóns, sem var húsameistari ríkisins, í hönnun stórhýsa. Árið 1918 var húsið fullgert og var vandað til innréttinga. Á stigunum var marmari og upp með honum höggmyndir eftir Guðmund Einarsson frá Miðdal, sem sýna myndir af mönnum sem mikil áhrif höfðu á verslunarsögu landsins. Þegar Reykjavíkurapótek flutti í húsið árið 1930 voru flutt í húsið tvö eirlíkneski eftir Thorvaldsen sem áður stóðu á þaki gamla apóteksins við Thorvaldsensstræti 6.