Það var glatt á hjalla heima hjá Indverska sendiherranum á Íslandi, Rajiv Kumar Nagpal, þegar Dr. Harbeen Arora hélt glæsilegt boð á heimili hans. Indverski sendiherrann býr í húsi sem var áður í eigu Rolfs Johansen heitins og Kristínar Ásgeirsdóttur og stendur við Laugarásveg í Reykjavík. Húsið er glæsilegt en það var teiknað af Kjartani Sveinssyni 1977.  

Dr. Harbeen stýrir samtökunum All Ladies League sem stendur fyrir Women Economic Forum sem eru samtök sem stuðla að valdeflingu kvenna á heimsvísu. 

Á þessu ári er stefnan að halda slíka ráðstefnu hérlendis og til þess að kynna verkefnið var Vigdísi Finnbogadóttur, Elizu Reid forsetafrú Íslands og fleiri framúrskarandi konum boðið til fundar við dr. Harbeen. Sendiherrafrúin, Lata Nagpal, er meistarakokkur en hún eldaði girnilega indverska rétti sem runnu ljúflega niður. 

Dr. Harbeen klæddist glæsilegum bleikum síðkjól þetta kvöld sem var sérsaumaður á hana af móður hennar.