Gunnar Þorsteinsson og Jónína Benediktsdóttir létu sig ekki vanta þegar Gunnar Birgisson fagnaði útkomu ævisögu sinnar í safnaðarheimilinu Borgum í Kópavogi. Orri Páll Ormarsson er höfundur bókarinnar og las hann upp úr verki sínu. 

Mikill fjöldi mætti til að fagna með Gunnari – bæði bókinni og ævintýralega skjótum bata en Gunnar fékk í síðasta mánuði alvarlegt hjartaáfall þar sem líkurnar á að hann lifði áfallið af voru afar litlar á tímabili.

Líf Gunnars Birgissonar hefur ekki verið neinn dans á rósum. Hann ólst upp við lítil efni og var hálfgerður einstæðingur; átti fjölda hálfsystkina og uppeldissystkina en var meira og minna á eigin vegum frá unglingsaldri. Fljótlega kom í ljós að Gunnar er hamhleypa til verka, hann braust til mennta og þegar hann fann fjölina sína sem verkfræðingur og síðar stjórnmálamaður var fátt sem gat stöðvað hann.