Landssamband sjálfstæðiskvenna hélt landsfundarhóf á Hótel Íslandi og þangað mættu um 150 konur. Hefð er að LS standi fyrir hófi fimmtudaginn fyrir landsfund og á því var engin breyting nú.

Bjarni Benediktsson, formaður Sjálfstæðisflokksins, ávarpaði gesti, Birna Bragadóttir, framkvæmdastjóri Sandhotel, var ræðumaður kvöldsins og hún blés öllum konum byr í brjóst með hrífandi frásögn um hvernig hún breytti hugsun sinni í lífinu og klífur nú fjöll, gengur á gönguskíðum þvert yfir landið eða hleypur og þegar hún hafnaði óvænt í 2. sæti á Íslandsmótinu í sjósundi.

Ari Ólafsson, sigurvegari í Söngvakeppni Sjónvarpsins, kom og tók nokkur lög.  Að venju veitir landssambandið heiðursverðlaun og að þessu sinni var Petrea Ingibjörg Jónsdóttir, starfsmaður Sjálfstæðisflokksins í 36 ár, heiðruð fyrir framlag sitt til Landssambands sjálfstæðiskvenna.