Það ríkti góð stemmning í Bíó Paradís á þriðjudaginn þegar myndin Mannasiðir var forsýnd. RÚV sýnir myndina í tveimur hlutum á páskadag og annan í páskum.

Myndin segir frá nítján ára menntaskólastrák sem sakaður er um gróft kynferðisbrot gagnvart bekkjarsystur sinni. Sagan fer hratt um skólann þar sem stúlkan skrifar um meintan verknað á samfélagsmiðla, en hann neitar allri sök. Sagan spannar um 10 mánuði og fjallar um meint kynferðisbrot, víðtæk áhrif þess, viðbrögð fjölskyldu og samfélags. 

María Reyndal er bæði leikstjóri og höfundur myndarinnar en með aðalhlutverkin í myndinni fara þau Eysteinn Sigurðarson, Ebba Katrín Finnsdóttir, Sólveig Guðmundsdóttir, Sveinn Ólafur Gunnarsson og Álfrún Laufeyjardóttir.