Sævar Þór Jónsson, lögmaður og einn eigenda lögmannsstofunnar Lögmenn Sundagörðum, hélt upp á fertugsafmæli sitt með glans á laugardaginn. Rúmlega 150 gestir heiðruðu afmælisbarnið með nærveru sinni og var mikil og góð stemmning í veislunni. Elvis steig upp úr gröfinni og tók nokkra af sínum þekktustu slögurum og Friðrik Ómar tók einnig lagið auk þess sem fleiri góð skemmtiatriði voru í boði við góðar undirtektir gesta. Meðal gesta voru ráðherrar og þingmenn auk lögmanna og ýmissa listamanna.

„Mér finnst sérlega skemmtilegt að í kjölfar afmælisins kom í ljós að ég á ættir að rekja til Ingólfs Arnarsonar, Guðrúnar Ósvífursdóttur, Sturlu Þórðarsonar sagnaritara, Auðar djúpúðgu og Göngu-Hrólfs. Svo kom líka á daginn að ég er af Presta-Högna ætt og líka af breskri aðalsætt Leodegarius sem kom með Vilhjálmi sigursæla frá Normandy á sínum tíma til Englands. Þetta er óneitanlega virðuleg ætt og skemmtileg blanda. Vitandi það að ég eigi þessa forfeður skil ég betur minn eigin karakter,“ segir Sævar Þór og brosir.