Það var margt um manninn við sýningaropnun í Kjallaranum í Geysi Heima síðastliðna helgi. Þar opnaði gluggagalleríið (sem er vanalega staðsett á Hverfisgötu) Wind and Weather Window Gallery, 5 ára „pop-up“ afmælissýningu í samstarfi við Geysi Heima.
Gluggagalleríið hefur vakið mikla athygli meðal vegfarenda síðastliðin ár. Galleríið er listamannsrekið en hugmyndin með því er að gera list aðgengilegri fyrir almenning á götum úti.
Afmælissýningin sem er nú yfirstandandi í Geysi Heima ber nafnið „INSIDE“ en nú gefst í fyrsta sinn tækifæri til að stíga inn í sjálft gluggagalleríið.
Verkin í INSIDE eru fjölbreytt og viðfangsefnin ólík, en hvorki meira né minna en 21 listamenn taka þátt: Amy Tavern, Anna Hallin, Anne Rombach, Ásdís Sif Gunnarsdottir, Auður Ómarsdóttir, Christopher Hickey, Claudia Hausfeld, Davíð Örn Halldórsson, David Zehla, Eygló Harðardóttir, Guðrún Benónýsdóttir, Halldór Ragnarsson, Kathy Clark, Katrin Inga Jónsdóttir Hjördísardóttir, Olga Bergmann, Ragnhildur Jóhanns, Rakel Gunnarsdóttir, Rebecca Erin Moran, Serge Comte, Myrra Leifsdóttir, Sigga Björg Sigurðardóttir og Úlfur Karlsson.
Á opnuninni var boðið upp á léttar veitingar og eins og sést á myndunum var gleðin við völd á Skólavörðustígnum þetta kvöld.
Sýningin mun nú standa yfir til 22. Júní næstkomandi í Geysi Heima.