45 ára starfsafmæli Íslenska dansflokksins var fagnað með pompi og prakt á mánudaginn og voru rúmlega 100 velunnarar dansflokksins mættir til að fagna þessum áfanga. Dansarar Íslenska dansflokksins opnuðu dagskrá afmælisins með atriði úr verkinu Hin lánsömu, en lokasýning þess er nú á miðvikudaginn.
Erna Ómarsdóttir, listdansstjóri Íslenska dansflokksins, kynnti komandi sýningarár dansflokksins sem hún segir að verði ár nýsköpunar og ævintýramennsku. „Meðal verkefna komandi árs eru Verk nr. 1 eftir Steinunni Ketilsdóttur, lokahnykkurinn í Myrkra-verkaröð Íd og Sigur Rósar. Splunkunýtt dansverk eftir belgíska danshöfundinn Pieter Ampe, og samstarfsverkefni Íd, Önnu Þorvaldsdóttur, Sinfoníuhljómsveitar Gautaborgar og Sinfoníuhljómsveitar Íslands, en það verk verður fyrst flutt í Gautaborg í maí á næsta ári,“ segir Erna um komandi ár.
Í afmælinu sýndu dansarinn Aðalheiður Halldórsdóttir og tónlistarkonan Kristín Anna Valtýsdóttir brot úr nýjum dúett en Erna segir dansflokkinn alltaf á höttunum eftir samstarfi við ólíkar listgreinar. „Dúettadansröð dansflokksins er eitt af þessum verkefnum en það er unnið í samvinnu við Listasafn Reykjavíkur,“ segir Erna.