Svava, Andrea og Bergljót standa saman

Fjörið var í Hafnarfirði þegar tískuskvísur létu gott af sér leiða með framleiðslu á stuttermabolum. 

Um er að ræða verkefnið Konur eru konum bestar, sem gengur út á að minna konur á að standa saman. Til þess að styrkja þetta málefni gastu keypt bol með áletruninni Konur eru konum bestar. Um 500 bolir seldust upp og rann ágóðinn til menntunarsjóðs Mæðrastyrksnefndar. 

Andrea Magnúsdóttir, fatahönnuður í Andreu, og Elísbet Gunnarsdóttir hjá Trendnet.is eru upphafsmenn verkefnisins en í ár fengu þær Rakel Tómasdóttur og Aldísi Pálsdóttur með sér í lið. 

„Bolirnir eru góðgerðarverkefni og í ár munum við styrkja menntunarsjóð Mæðrastyrksnefndar og reyna að vekja fólk til umhugsunar með okkar framtaki. Menntun er dýrmæt, en kostar líka sitt. Frá árinu 2012 hefur menntunarsjóður Mæðrastyrksnefndar Reykjavíkur gert yfir 100 tekjulágum konum kleift að stunda nám. Okkur finnst það passa vel að við konur styrkjum aðrar konur til náms og nýrra tækifæra. Við dáumst að þessum sjóði sem veitir efnalitlum konum stór tækifæri sem þær annars hefðu ekki kost á, tækifæri til þess að skína,“ segir Elísabet. 

Verkefnið var kynnt í versluninni Andreu í Hafnarfirði og lagði fjölbreyttur hópur kvenna leið sína í boðið til að fagna með þeim.