Það var glatt á hjalla í Þjóðleikhúsinu á föstudagkvöldið þegar Öryggismiðstöðin hélt sinn árlega haustfagnað. Sjálfur Bjartmar Guðlaugsson steig á svið og hélt hörkugóða tónleika eins og honum einum er lagið. Kappinn flutti flesta af gömlu slögurunum sínum við mikinn fögnuð um 600 gesta sem fylltu Þjóðleikhúsið. Eftir hlé stigu Naglbítarnir á svið og héldu uppi stuðinu af miklum krafti.

Öryggismiðstöðin bauð starfsmönnum sínum og viðskiptavinum á viðburðinn sem er orðinn fastur í sessi hjá fyrirtækinu.

„Þetta heppnaðist mjög vel og það er frábært að geta boðið starfsmönnum og viðskiptavinum í svona flotta tónlistarveislu í þessu magnaða húsi sem Þjóðleikhúsið er. Kjarninn í viðburðinum er að bjóða upp á íslenska tónlist eins og hún gerist best. Við höfum áður verið með Mugison, Fjallabræður, Kaleo, Hjálma, Valdimar og fleiri bönd. Bjartmar og Naglbítarnir voru í miklu stuði þannig að nú tekur við að finna atriði fyrir næsta ár sem verður a.m.k. á pari við þá. Við gerum okkar besta og förum að leggja höfuðið í bleyti fljótlega,“ segir Ómar Örn Jónsson, markaðsstjóri Öryggismiðstöðvarinnar.