Ný grínsería hefur litið dagsins ljós, Venjulegt fólk, og var hún frumsýnd í Smárabíói fyrir helgi. Fannar Sveinsson leikstjóri mætti með son sinn, Eyvind, sem er alveg að verða eins árs. Fannar varð þekktur þegar hann byrjaði með þáttinn Hraðfréttir ásamt Benedikt Valssyni. Þættirnir byrjuðu á mbl.is en fluttu svo yfir á RÚV.
Húmor Fannars skín í gegn í þáttununum en hann skrifar handritið ásamt Völu Kristínu Eiríksdóttur, Júlíönu Söru Gunnarsdóttur og Dóra DNA.
Með aðalhlutverk þáttanna fara Vala Kristín Eiríksdóttir og Júlíana Sara Gunnarsdóttir, Hilmar Guðjónsson og Arnmundur Ernst Backman.
Fjöldi gesta mætti á frumsýningu þessara tveggja þátta sem eru komnir í heild sinni inn á Sjónvarp Símans Premium. Þar á meðal Jóhannes Haukur Jóhannesson stórleikari.