Nokkrar útvaldar smekkskonur mættu í Epal í Skeifunni í gær og gerðu sína eigin útgáfu af einum vinsælasta vasa landsins, Omaggio-vasanum frá Kähler. Reyndi á listræna hæfileika kvennanna enda erfiðara að mála rendurnar frægu á vasana en fólk heldur.
Bloggararnir Berglind Guðmundsdóttir og Þórunn Ívarsdóttir reyndu við rendurnar með ágætis útkomu en annars fékk hugmyndaflugið að ráða för. Á meðan jólatónlist ómaði í tækinu málaði Þórunn Högnadóttir vasann sinn doppóttan og fatahönnuðurinn Andrea Magnúsdóttir málaði fallega kjóla, jólakjóla, á sinn vasa.
Vasarnir fá sömu meðferð og aðrir vasar frá Kähler sem hefur framleitt vörur sínar í sömu verksmiðju í yfir 150 ár. Þess vegna verða keramikvasarnir sendir til Danmerkur í brennslu og má búast við að litir og áferð vasanna taki einhverjum breytingum við það.