Opnunarhátíð norræna danstvíæringsins ICE HOT Nordic Dance Platform fór fram í Borgarleikhúsinu á miðvikudagskvöldið. Á opnunarhátíðinni kenndu þau Margrét Bjarnadóttir og Friðgeir Einarsson „fullveldisdans“ og fóru yfir dansmenningu Íslands frá fullveldi. Herlegheitin enduðu svo með sýningu á FÓRN í uppfærslu Íslenska dansflokksins.
Hátíðin í ár ber yfirskriftina Ísheit Reykjavík og lýkur á sunnudaginn. Um er að ræða stærsta samstarfsverkefni Norðurlanda í dansi og er Reykjavík síðasta höfuðborg Norðurlandanna til þess að halda hátíðina sem hefur verið haldin á tveggja ára fresti síðustu átta ár.
Á aðeins fjórum dögum verða 39 dansverk frá öllum Norðurlöndunum sýnd og kynnt í Reykjavík. Hægt er að skoða dagskrá hátíðarinnar hér.