Mikil gleði og hamingja var áberandi á árshátíð Origo á dögunum. Árshátíðin fór að sjálfsögðu fram í Origo-höllinni. Um 500 manns skemmtu sér konunglega á hátíðinni sem bauð upp á mikla litadýrð enda var latín carnival þema í gangi.

Flestir árshátíðargesta tóku þátt í salsa danskennslu sem boðið var upp á á kvöldinu og var mikið stuð á dansgólfinu. Þetta var án efa ein fjölmennasta danskennsla sem haldin hefur verið á Íslandi en það var Salsa Iceland sem sá um kennsluna.

Emmsjé Gauti tók skemmtilegt atriði og Albatross með Sverri Bergmann í broddi fylkingar spilaði. Anna Svava og Villi naglbítur voru veislustjórar og fengu marga til að hlæja. Villi sýndi gamla tónlistartakta sem vöktu mikla kátínu. Erna Hrönn söngkona stökk upp á sviðið og tók Lady Gaga-lagið Shallow og ætlaði þá allt um koll að keyra í höllinni.

„Fólk skemmti sér mjög vel og það voru allir svo hamingjusamir. Starfsmenn hafa talað um að þetta sé besta árshátíð sem haldin hefur verið og það verður hreinlega erfitt að topa þetta en við í starfsmannafélaginu munum sannarlega reyna að ári,“ segir Arnór Reynisson, starfsmaður Origo og stjórnarmaður starfsmannafélags fyrirtækisins.