Nína Dögg Filippusdóttir átti stjörnuleik í sýningunni Loddarinn sem frumsýnd var í Þjóðleikhúsinu á laugardaginn. Eiginmaður hennar, Gísli Örn Garðarsson, lét sig ekki vanta. 

Nína Dögg leikur Emíru sem er eiginkona Orgeirs sem er forríkur og leikinn af Guðjóni Davíð Karlssyni. Hilmir Snær Guðnason leikur Guðreð sem kemur öllu í bál og brand með loddaraskap sínum en upphaflega ætlar Orgeir að gefa Guðreði dóttur sína en loddarinn í hvítu fötunum vill eitthvað aðeins meira en það. Svo er dóttirin líka lesbísk og hefur lítinn áhuga á miðaldra aumkunarverðum manni sem lítur út eins og einn Bee Gees bróðir á slæmum degi. 

Sýningin er einstaklega litrík og skemmtileg. Geggjaðir búningar og textinn magnaður en Hallgrímur Helgason rithöfundur og myndlistarmaður þýddi verkið á einstakan hátt. 

Á frumsýningunni var ekki þverfótað fyrir skrautfjöðrum eins og sést á myndunum. Allir í sínu fínasta pússi með sparibros á vör.