Frú Vigdís Finnbogadóttir, Lilja Alfreðsdóttir menntamálaráðherra og Eliza Reid forsetafrú voru mættar í Veröld, Hús Vigdísar í gær til að afhjúpa Mæðrablómið en þær styðja við átakið. Mæðrablómið er selt til að styrka Menntunarsjóð Mæðrastyrksnefndar. Mæðrablómið í ár er hannað af Þórunni Árnadóttur hönnuði og er það kerti með leyniskilaboðum í botninum.
Eins og sést á myndunum var ljúf og góð stemning í Húsi Vigdísar.
„Sjóðurinn einbeitir sér að því að styrkja konur sem þurfa hjálparhönd til að afla sér menntunar. Í gegnum sjóðinn fá þær fjárhagsstyrk, sem gerir oft gæfumuninn í því að þær geti sest á skólabekk án þess að vera að demba sér í djúpar skuldir, styrkurinn borgar kostnað við skólagjöld og bækur. En svo er það mín tilfinning að það sé líka mikil hvatning að finna að það eru til bjargráð og einhver sem trúir á þig og við trúum svo sannarlega á þessar mögnuðu konur sem fá styrkina. Þær eru með ofurkröftum að rífa sig upp úr hjólfari og vilja og geta breytt lífi sínu. Við vitum að menntun er alltaf til góðs ekki bara upp á að fá betra starf en líka til að efla styrkþega persónulega. Við erum að safna fé allt árið með því að senda styrktarbeiðnir til fyrirtækja en þetta söfnunarátak gerir það vonandi að verkum að við eigum nægt fé til að þurfa ekki að hafna umsækjendum um styrki,“ sagði Guðríður Sigurðardóttir formaður Menntunarsjóðs Mæðrastyrksnefndar í viðtali á þriðjudaginn.