Þórhallur Sigurðsson betur þekktur sem Laddi opnaði eigin myndlistarsýningu í Smiðjunni Listhúsi í Ármúla 36 um helgina. Laddi, sem einn af okkar þekktustu grínleikurum fyrr og síðar, er ekki bara fyndinn og sniðugur heldur líka flottur myndlistarmaður en hann hefur lengi málað.

Hann hélt sína fyrstu einkasýningu í Smiðjunni Listhúsi árið 2017 og seldust þá allar 25 myndir hans upp á einum sólarhring. Nú hélt Laddi sýningu númer tvö á sama stað og eins og síðast var húsfyllir á opnunarkvöldinu og myndir hans seldust nær allar. Mikil stemmning var í opuninni hjá Ladda enda mikið um skemmtiatriði og margt góðra gesta.

Laddi segist byrja á að teikna myndirnar og mála þær svo með olíumálningu.

„Þetta eru nokkurs konar portrett myndir, nema þetta eru kannski ekki alveg eðlileg andlit, heldur meira hálfgerðar fígúrur. Kannski má segja að þetta séu karakterar sem ég næ ekki að skapa á sviði og verða því til í myndum mínum,“ segir Laddi sem er orðinn 72 ára að aldri en hefur nóg fyrir stafni. Ennþá eru tvær myndir óseldar en sýningin til 3. júní.