Árelía Eydís Guðmundsdóttir dósent við Háskóla Íslands fagnaði útgáfu bókar sinnar, Söru, á vinnustofu Kjarval á dögunum. Vel var mætt í boðið og mikið stuð. Sara er önnur skáldsaga Árelíu Eydísar en fyrir nokkrum árum kom út bókin Tapað - fundið sem fékk virkilega góðar viðtökur. 

„Innilega til hamingju með afmælið þitt. Ég hef hugsað til þín lengi og oft velt því fyrir mér hvort þú gerðir þér grein fyrir hversu mikil áhrif þú hafðir á líf mitt. Ég hefði ekki orðið að því sem ég er nema af því að ég hitti þig. Þín spor í lífi mínu eru djúp og varanleg. Þú ert stórkostleg kona sem gerir lífið betra og ljúfara með því að vera hér,“ segir í skilaboðum sem fylgja glæsilegum demantshring sem Sara Jónsdóttir, 45 ára ekkja og einstæð móðir, fær í afmælisgjöf. Hvergi kemur fram hver er svona rausnarlegur, en hana grunar að hann sé að finna í fortíð hennar. Hún ákveður að fara í ferðalag í gegnum líf sitt í leit að þessum manni, ferðalag þar sem hún þarf að takast á við ýmsa drauga sem hafa fylgt henni.