Það var eftirvænting í loftinu í gær þegar Þétting hryggðar, nýtt verk eftir Halldór Laxness Halldórsson, var frumsýnt í Borgarleikhúsinu. Verkið er ferskt og fyndið en höfundurinn sem jafnan er kallaður Dóri DNA er þekktur uppistandari, víninnflytjandi og boxáhugamaður. 

„Við erum öll einbýlishús, jólaskrautið uppi og öll ljós kveikt, ein upp á hól og enginn veit hvað er að gerast inni.“

Nútímakona úr Hlíðunum, arkitekt úr Vesturbænum, unglingur úr Breiðholti og iðnaðarmaður úr Grafarvogi.

Fjórir Reykvíkingar eru læstir inni í fundarherbergi í Borgartúninu af öryggisástæðum. Þau deila um skipulagsmál, Dominos og hverjum er raunverulega hægt að kenna um allt sem er að. Ef byggðin er of þétt, þá heyrum við tómahljóðið í hjörtum nágranna okkar og þá er erfiðara að sofna á kvöldin. Þar liggur vandinn.