Önnur þáttaröð af Stellu Blómkvist var frumsýnd fyrir fullum sal í Smárabíói en þáttaröðin kemur í heild sinni í Sjónvarp Símans Premium í dag. Heida Reed, sem leikur Stellu, komst því miður ekki á sýninguna þar sem hún er stödd í Búdapest þar sem hún fer með aðalhlutverk í glænýrri bandarískri þáttaröð FBI:International sem er nýhafin í Sjónvarpi Símans Premium.
Þættirnir um Stellu eru sex talsins og eru þeir byggðir á samnefndum glæpasögum eftir höfund sem skrifar undir dulnefninu Stella Blómkvist. Í þáttunum er fylgt eftir andhetjunni, tálkvendinu og lögfræðingnum Stellu Blómkvist, sem fetar sínar eigin slóðir. Í starfi sínu sem lögfræðingur vílar hún ekki fyrir sér að beita brögðum til að fá sínu framgengt og tekur að sér snúin mál þar sem hún sér möguleika á að uppræta spillingu og glæpi hjá einstaklingum í valdastöðum.
Óskar Þór Axelsson og Þóra Hilmarsdóttir leikstýrðu Stellu Blómkvist en Sagafilm stendur að baki framleiðslunni. Handritið er skrifað af þeim Jóhanni Ævari Grímssyni, Snjólaugu Lúðvíksdóttur, Jónasi Margeiri Ingólfssyni og Dóru Jóhannsdóttur. Ásamt Heidu Reed fara þau Krístín Þóra Haraldsdóttir, Þorsteinn Guðmundsson, Sara Dögg Ásgeirsdóttir, Jóhannes Haukur Jóhannesson, Edda Björgvinsdóttir, Saga Garðarsdóttir og Halldór Gylfason með stór hlutverk ásamt mörgum öðrum landsþekktum leikurum.