Óttar Guðmundsson geðlæknir og Þórarinn Tyrfingsson fyrrverandi yfirlæknir á Vogi létu sig ekki vanta í teiti til Einars Más Guðmundssonar. Einar Már var að senda frá sér skáldsöguna Skáldleg afbrotafræði og var útgáfunni fagnað í Eymundsson á Skólavörðustíg. 

Skáldleg afbrotafræði er makalaus aldarfarssaga sem bregður upp litríkri mynd af samfélagi og tíðaranda í byrjun 19. aldar.

Nýjar hugmyndir eru á kreiki í veröldinni og upplýsingarstefnan að ryðja sér til rúms, meira að segja í örsmáu sjávarþorpi á hjara veraldar. Prestar og hreppstjórar ráða enn örlögum smælingja en alþýðan er farin að átta sig á óréttlætinu og það styttist í að hún láti verkin tala.

Hér eru ótal þræðir á lofti; gleði og sorg, kúgun og frelsi, sögulegur fróðleikur í bland við yfirskilvitleg fyrirbæri, magnaðar persónur og misfagrir hugarheimar – og allt þetta fellir höfundurinn saman í þéttan og margslunginn vef eins og honum er lagið.

Einar Már Guðmundsson hefur sent frá sér tugi skáldverka og hlotið fyrir þau ýmis verðlaun. Bækur hans hafa verið gefnar út víða um lönd en sérstakra vinsælda nýtur hann í Danmörku, þar sem bækur hans koma nú út samtímis útgáfu hér heima.

Eins og sjá má á myndunum er hann ekki bara góður í að skrifa bækur heldur prýðilegur partíhaldari!