Hælið eftir Emil Hjörvar Petersen, fyrsta prentaða bók Storytel á Íslandi, er komin út. Af því tilefni hélt hann útgáfuhóf í Húsi máls og menningar. 

Hljóðbókin kom út 30. september síðastliðinn og hefur setið í efsta sæti á topplista íslenskra hljóðbóka síðan þá en í gær kom prentaða útgáfan í verslanir. Útgáfa bókarinnar markar tímamót því Storytel gefur hana einnig út á prenti og er þar með þátttakandi í jólabókaflóðinu. 

„Ég er að sjálfsögðu hæstánægður með viðtökurnar og feginn því að bókin sé komin út og það á öllum formum. Þetta er saga sem hefur verið mér hugleikin lengi og ég gæti ekki beðið um betra samstarf um útgáfu,“ segir Emil Hjörvar Petersen.

Hælið er hroll­vekj­andi skáld­saga með sögu­legu ívafi, sögu­sviðið er gamla Kópa­vogs­hælið, sem bæði hef­ur verið berkla­hæli og holds­veikra­spítali, og svæðið við botn Kópa­vogs þar sem á öld­um áður var þingstaður og saka­menn meðal ann­ars tekn­ir af lífi. Ugla, Leif­ur og ung­ling­ar þeirra tveir flytja í nýtt hverfi í námunda við hælið og allt virðist leika í lyndi. Fljót­lega fer að bera á óhugnaði sem virðist tengj­ast skugga­legri fortíð staðar­ins.