Guðni Ágústsson fyrrverandi ráðherra fagnaði útkomu bókar sinnar, Guðni á ferð og flugi, um nýliðna helgi. Guðjón Ragnar Jónasson skrásetti bókina sem þykir afar áhugaverð. Það kemur ekkert á óvart þar sem Guðni er með þeim skemmtilegri og getur fengið alla fýlupoka heimsins til að hlæja.
Í útgáfuhófinu byrjaði Guðjón á því að kynna bókina og segja stuttlega frá tilurð hennar. Guðni sagði einnig frá ferðalögunum í tengslum bókarskrifin og sagðist í ferðinni hafa heilsað upp á gömul og ný kennileiti á slóð minninganna.
Útgáfuhófið fór fram í glæsilegum samkomusal í Risinu í Mjólkurbúi Flóamanna sem hentaði vel þar sem Guðni flutti nýlega á Selfoss með eiginkonu sinni, Margréti Hauksdóttur. Eins og sést á myndunum var fjör enda kann Guðni að halda teiti!