Það var einstök stemning í verslun Franks Michelsens á Hafnartorgi þegar hann fagnaði því að verslunin væri farin að selja afurðir frá ítalska tískuhúsinu Gucci. Þótt Michelsen sé þekktur úrasali og selji með fínustu úrunum í bænum, þar á meðal Rolex, þá er hann einnig með glæsilega skartgripi. Nú er hann farinn að selja úr og skartgripi frá Gucci sem er mikið gleðiefni fyrir fólk sem vill gera vel við sig.
Í teitið mættu nokkrir hörðustu Gucci-aðdáendur landsins eins og Guðmundur Birkir Pálmason eða Gummi kíró eins og hann er jafnan kallaður. Þar var líka Lína Birgitta Sigurðardóttir unnusta hans, Hafdís Jónsdóttir eigandi World Class og dóttir hennar, Birgitta Líf Björnsdóttir, eigandi Bankastræti Club og markaðsstjóri World Class.
Emmsé Gauti söng fyrir gestina og boðið var upp á kampavín og kökur á meðan fólk drakk í sig nýjustu strauma og stefnur frá Ítalíu.