Það var allt á útopnu á Grand hóteli á laugardagskvöld þegar framsóknarmenn slettu úr klaufunum eftir gott flokksþing fyrr um daginn. Forysta flokksins mætti í sínu fínasta pússi og dansaði fram á nótt en Jógvan Hansen lék fyrir dansi.

Einn nýjasti flokksfélaginn, Einar Þorsteinsson, var að sjálfsögðu mættur í partíið ásamt eiginkonu sinni Millu Ósk Magnúsdóttur. Einar leiðir lista Framsóknar í borginni í komandi sveitarstjórnarkosningum. 

Framsóknmenn sýndu og sönnuðu í kosningabaráttunni á síðasta ári að þeir kunna svo sannarlega að halda partí, en athygli vakti þegar Only Fans-stjarnan Ósk Tryggvadóttir sýndi listir sínar sem eldgleypir í einu partíinu.